काठमाडौं– चीन सरकारले नेपाललाई दिन लागेको आवश्यक स्वास्थ्य सामग्री बोकेर चिनियाँ विमान आउने भएको छ ।
कोरोना भाइरसको सम्भावित जोखिमलाई ध्यान दिँदै चीन सरकारले नेपाललाई स्वास्थ्य सामग्री सहयोग गर्ने भएको हो । आजको नेपाल समाचार पत्रले परराष्ट्र मन्त्रालयलाई उद्धृत गर्दै चीनको ग्वान्जाउबाट सहायता सामग्री बोकेको विमान काठमाडौं आउन लागेको समाचार छापेको छ ।
नेपालले कोरोनाविरुद्ध लड्न पर्याप्त औषधि तथा उपकरण नभएको भन्दै आवश्यक सहयोग माग गरेपछि चीनले सहायता सामग्रीसहितको विमान पठाउन लागेको हो ।
परराष्ट्र मन्त्रालयको अनुसार चीनको राष्ट्रिय ध्वजावाहक चाइन साउदर्न एयरलाइन्सको विमान सहायता सामग्री बोकेर विमान मंगलबारसम्म काठमाडौं आउने छ ।
नेपालले चीनसँग १९ थरी स्वास्थ्य सामाग्री मागेको छ। जसमा मोबाइल एम्बुलेन्स, मास्कदेखि कोरोना भाइरस जाँच्ने किटसम्म छन् ।
यसअघि सोमबार मात्रै चिनियाँ राजदूत होउ यान्कीले अहिलेको संकटका बेला नेपाल एक्लै नरहेको बताउनु भएको थियो ।
उहाँले नेपाललाई सदैव चीनको साथ रहेको उल्लेख गर्दै आवश्यक सहयोग सामग्री पठाउने तयारी भइरहेको जानकारी दिनुभएको थियो ।
-
खुला नेपाल डेस्क
खुला नेपाल झण्डै तीन दशक नेपाली पत्रकारितामा योगदान दिएका अनुभवी पत्रकारको नेतृत्वमा २०७६ सालबाट संचालनमा आएको अनलाइन समाचार पोर्टल हो ।
-
लेखकबाट अन्य
