काठमाडौँ । स्वास्थ्य तथा जनसंख्या मन्त्रालयले कोरोना विरुद्ध फ्रन्टलाइनमा कार्यरत स्वास्थ्यकर्मीमाथि दुर्व्यवहारमा संलग्नमाथि कडा कारवाही हुने बताएको छ ।
स्वास्थ्य मन्त्रालयका प्रवक्ता डा.जागेश्वर गौतमले आइतबार नियमित प्रेस ब्रिफिङका क्रममा स्वास्थ्यकर्मीमाथि दुर्व्यवहार गर्ने जोसुकैलाइ पनि कारवाही गर्न मन्त्रालयले निर्देशन दिएको बताउनुभयो ।
यस्तो संकटको बेला उपचारमा खटिएका स्वास्थ्यकर्मीमाथि दुर्व्यवहार र अपमानजनक घटनाको मन्त्रालयले कडा निन्दा गरेको छ ।
मन्त्रालयले निजामती कर्मचारी अस्पतालका डाक्टरमाथि दुर्व्यवहार गर्ने मिलन चोकका स्थानीयमाथि कारवाही गर्न जिल्ला प्रशासन कार्यालयलाई पत्राचार समेत गरिसकेको छ ।
यस्तो गलत कुरालाई कसैले पनि प्रोत्साहन नगर्न समेत मन्त्रालयले सबैलाइ आग्रह गरेको छ ।
काठमाडौका प्रमुख जिल्ला अधिकारी जनक दाहालले दोषीलाई समातेर कानुन अनुसार ६ महिना जेल हाल्ने सार्वजनिक प्रतिक्रिया दिइसक्नुभएको छ ।
-
खुला नेपाल डेस्क
खुला नेपाल झण्डै तीन दशक नेपाली पत्रकारितामा योगदान दिएका अनुभवी पत्रकारको नेतृत्वमा २०७६ सालबाट संचालनमा आएको अनलाइन समाचार पोर्टल हो ।
-
लेखकबाट अन्य
