मुक्तक
दौडिएर समय भन्दा नै अघि चल्नु छ
ती हातले गोडमेल गरी सुनचाँदी फल्नु छ
कुना बसी केहि नै भएन किन भन्छौ युवा,
तिम्रै सोचले अव तिम्ले विश्व बदल्नु छ।
लक्ष्मी स्मृति, विराटनगर–५
***********************************************************************************************************
मुक्तक
तिमी बोल्दा नै कसैको गीत बन्छ भनें
तिमी हार्दा नै कसैको जीत बन्छ भनें
बोली देउ न त, हारिदेउ कहिले काहिँ
तिम्रो अहित नभै कसैको हित हुन्छ भनें ।
अवतार ढकाल, भोजपुर
***********************************************************************************************************
मुक्तक
के जानेका छौ तिमी मेरो देशको बारेमा
गुन्युचोेली दौरा सुरुबाल भेषको बारेमा
चन्द्रसूर्य बोकी गगन चुम्छ ध्वज फर्फराई
के जान्यौ नेपाली वीरगाथा शेषको बारेमा
राजा राज सुवेदी , कारिकोट स्याङ्जा
***********************************************************************************************************
मुक्तक
सुनेर सबै मर्नु पर्ने हुन्छ मीठो नबोल
अझैपनि अमृत देखाएर बिष नघोल
धोका पाइयो विश्वास गरेर तिमीमाथि
गन्हाएको वर्तमानको ईतिहास नखोल ११
बैद्यनाथ ठाकुर, प्रगतिनगर– ३, वीरगन्ज
***********************************************************************************************************
मुक्तक
प्रकृतिका सुन्दर छटाहरू घुमेर तृप्त पार्छु मन
पखेराका सुन्दर फूलहरू चुमेर तृप्त पार्छु मन
हिमाल,पहाड, तराईका फाँटहरू डुलेरै बिताउँछु
सृजनाका मिठा अनुभवमा झुमेर तृप्त पार्छु मन
जमुना पौड्याल, विराटनगर–३
***********************************************************************************************************
मुक्तक
वीर गोर्खाली सम्झदा छाती फुकेको छ
जन्मेको माटोको माया मुटुभरी लुकेको छ
मियो बिनाको दाइ देखिरहे आँखाहरुले
कसरी हाँस्न सक्छु र आज देश दुखेको छ ।
बिमला अधिकारी देवकोटा, चितवन भरतपुर–१२
***********************************************************************************************************
मुक्तक
कसो गरी मनाऊ दशैं, छैन कत्ति मनमा रहर
हराउला भन्दाभन्दै बढ्यो झन कोरना कहर
आफ्ना आफन्त ईष्ट मित्र भाछन सबै बिराना
झल्को लाग्छ मनमा गाउँको, ब्यर्थ भयो शहर ।
सुचिता काफ्ले, सुकेधारा, काठमाडौं
***********************************************************************************************************
मुक्तक
रुँदै रुँदै जन्मेको हुँ धर्तिमा रोएर नै बाँचेको छु
ब्वाँसाहरु बिच पनि सुन्दर सपना साँचेको छु।
रामशाहको देश हो यो न्याय पाउन गाह्रो छैन,
जिउँदै छ कि मर्यो उक्ति मनै मनले जाँचेकी छु।
चन्द्रावती अधिकारी, कोहलपुर बाँके
***********************************************************************************************************
मुक्तक
अतितले झस्काइदिन्छ कराउँछु म।
सपनीमा नआउ तिमी डराउँछु म।
पल-पल पीडा सहन सक्दिन अब।
आफ्नै दुनियाँको खुसीमा हराउँछु म।
गजेन्द्र दाहाल, दिप्रुङ– ५ खोटाङ
***********************************************************************************************************
मुक्तक
बढेको छ भोक रोग भ्रष्टाचार
समाप्त भइसक्यो शिष्टाचार
उपरी कमाइ छ प्यारो सबैको
देखावटी हो अब लोकाचार !!
सीता शर्मा, राधेमाई, वीरगन्ज
***********************************************************************************************************
मुक्तक
चिन्ता, डरलाई मनबाट छुटाउनु पर्छ
आशा, संभावनाको मुल फुटाउनु पर्छ
कठिन छ परिस्थिति,यावत व्यवधान
बाँच्नलाई अब हिम्मत जुटाउनु पर्छ ।
रामचन्द्र भट्टराई, स्याङ्जा
***********************************************************************************************************
मुक्तक
सपनाको रंगीन संसारमा प्रवेश गर्दै जाग्छन नयन
अज्जुलीमा फूल भर्दै मायाको सुवास माग्छन् नयन
आड भरोसा विश्वास सबै टुटेर होला आजभोलि
तिम्रो स्वार्थी छाया पर्दै दुर दुर भाग्छन् नयन
ज्ञानु घिमिरे, काठमाडौं
***********************************************************************************************************
मुक्तक
भौतिकवादको सत्ता आयो तर आस्था उही छ।
हजारौंको वलीदान भयो तर व्यवस्था उही छ ।
महलकी रानीलाई सुन पुगेन, नुन छैन झुपडीमा
गणतन्त्र रुन्छ ढड्डामा जनताको अवस्था उही छ ।।
सृजना सरोवर
-संयोजन : गंगा दहाल
-
खुला नेपाल डेस्क
खुला नेपाल झण्डै तीन दशक नेपाली पत्रकारितामा योगदान दिएका अनुभवी पत्रकारको नेतृत्वमा २०७६ सालबाट संचालनमा आएको अनलाइन समाचार पोर्टल हो ।
-
लेखकबाट अन्य
