कोरोनाबाट ३२ जनाको मृत्यु, थप ३ हजार ५४० जनामा संक्रमण

काठमाडौँ । नेपालमा पछिल्ला चार दिनमा कोरोना संक्रमणबाट थप ३२ जनाको मृत्यु भएको छ । स्वास्थ्य तथा जनसंख्या मन्त्रालयले पछिल्लो २४ घण्टामा मृत्यु हुने र यसअघिको तथ्यांकमा छुटेकासमेत गरी मृतक संख्या ३२ पुगेको जानकारी दिएको हो ।

मन्त्रालयको आजको कोभिड १९ प्रेस ब्रिफिङमा प्रवक्ता डा. संगीता मिश्राले माघ १३ देखि आजसम्ममा कोरोनाबाट ३२ जनाको मृत्यु भएको बताउनुभयो ।

उहाँका अनुसार वीरेन्द्र सैनिक अस्पतालबाट आजसम्म १२ जनाको मृत्यु भएको तथ्यांक प्राप्त भएको छ । त्यस्तै माघ १३ देखि आजसम्म विभिन्न अस्पतालमा २० जनाको मृत्यु भएको मन्त्रालयको भनाइ छ ।

यस्तै पछिल्लो २४ घण्टामा थप ३ हजार ५४० जनामा कोरोना भाइरसको संक्रमण पुष्टि भएको छ ।

स्वास्थ्य मन्त्रालयका अनुसार ९ हजार ९१० पीसीआर परीक्षण गर्दा ३ हजार ४९ जना र ३ हजार २३५ एन्टिजेन परीक्षण गर्दा ४९१ जनामा कोरोना संक्रमण पुष्टि भएको हो । हाल देशभरमा ८३ हजार ९९९ सक्रिय संक्रमित छन् भने ६ हजार ३५९ जना संक्रमणमुक्त भएका छन् ।