मायाले दिएको
पीरको टाटो छोप्न
तिम्रो देब्रे गालाको
डिम्पल छोपेर
हासी हासी
दाहिने हातका
पाँचै औंलाले अबीर र केशरी
मोलेर लाइदिनु छ ।
रंग खुशी बनेर
बगेको छ
उमङ्ग बनेर
छचल्किएको छ
उत्सव बनेर
उछालिएको छ
हासो बनेर
मुस्कुराएको छ
चाड बनेर
चर्चित छ ।
फागुले
चाउरिएका गालाका
मुजा पुर्दै
दिक्दारी मनलाई
प्रफुल्ल पारेर
निरास मान्छेलाई
हर्सित बनाउँदै
बिछोड आत्मालाई
मिलनका लागि रंगको
फड्के हाल्दियो
मान्छेलाई मान्छे जस्तै
खुसी पार्न मादक
उमङ्ग लप्का सरी फैलियो ।।
पैंयुको रूखमा चढेर
आएको फागु
गुराँसको बोटमा चढेर
छाएको फागु
आकाश गङ्गाको
चन्द्रमाले छरेको फागु
मान्छेको निधार टल्किएको
गालामा सजिएको
मोहक तस्वीर
मूलढोका माथि टाँसेको
नागको तस्वीर झैँ
वर्ष दिनभरि सजाई रहुँला
रंगले हुर्काएका
आम मनहरूलाई
फागुको शुभकामना ।।।
प्रतिक्रिया
-
खुला नेपाल डेस्क
खुला नेपाल झण्डै तीन दशक नेपाली पत्रकारितामा योगदान दिएका अनुभवी पत्रकारको नेतृत्वमा २०७६ सालबाट संचालनमा आएको अनलाइन समाचार पोर्टल हो ।
-
लेखकबाट अन्य
