कोण सभा गर्ने चोकमा
फोहोरको डुङ्गुर
दुङ्दुङ गन्हाएको छ
सभा गर्न सक्नु हुन्न
मास्कले छेक्न सक्दैन
बूढी र चोरी औंलाले
नाक च्यापेर आउनु ।
आउने बाटोमा
खै कुन ठेकदारले नपुरेको हो ?
गहिरो खाल्डो छ
फुटेको ढल जमेको छ
जुत्तामा फोहोर दलिन्छ
तर्किएर आउनु ।
घरबेटीले मिचेर
साँघुरो भएको सडक पेटि छ
शरीर कोल्टे परेर छिर्दै आउनु
साहुजीले सडक पेटी कब्जा गरिराखेको
झिलिमिली दुकान छ
न अल्झिकन आउनु
पहिलाका खोलामा
अहिले घर फलेका छन्
बाटो नभुलीईकन आउनु ।
पोलबाट लत्रिएका तारको
मुठोले निधार कोतर्छ
काटे चोप पानी न आउने
खानेपानीका धारा छन्
रमिता हेर्दै हेर्दै आउनु ।
अस्पताल गेटमा
टाउकोमा हात लाएर बसेका
मधौरा छन् आँखा लाउदै आउनु ।
नाङो आकाश मुनि
पुस्तक माग्न
दुई हात थापेर बसेका
कलिला नानी बाबु छन्
कालो चश्मा खोलेर
तिनको भविष्य हेर्दै आउनु ।
पासपोर्ट बनाउने लाइनका
नौजवानको भाग्य हेर्दै आउनु
खोलामा पुल छैन
तर्नलाई
बुइँ चडेर आउनु ।
खोल्सामा कल्भर्ट छैन
गाउँमा एम्बुलेन्स छैन
अरु त के कुरा
नागरिकको खासमा
इज्जत छैन तैपनि
आफ्नो नगरको
बिजोग हेर्दै हेर्दै
रेमण्डको सुट
अर्मानिको जुत्ता
रोलेक्सको घडी पहिरिएर
टोयोटाको पजेरोमा
भोट माग्न आउनु
म रमिता हेरौंला ।
-
खुला नेपाल डेस्क
खुला नेपाल झण्डै तीन दशक नेपाली पत्रकारितामा योगदान दिएका अनुभवी पत्रकारको नेतृत्वमा २०७६ सालबाट संचालनमा आएको अनलाइन समाचार पोर्टल हो ।
-
लेखकबाट अन्य
